新蒲崗特色米線舖「雲南人家」｜必試木瓜冰

今日放工後嚟到呢間位於新蒲崗（Mikiki附近、過一條街）嘅米線舖「雲南人家」。呢間餐廳最多人推介係豆腐花米線，不過其實除此之外，都有自選米線／米粉／客飯等可以食到。今日我哋揀咗自選米粉同埋叫左招牌木瓜冰。

自選米粉—麻辣湯；三餸—肥牛、燜肉、滷蛋 （$47）

先嚟講第一碗自選米粉，湯底揀左麻辣湯底，辣度雖然無得自己選擇但店家整得啱啱好，微微辣嘅味道好正；而配料有肥牛、燜肉同滷蛋，肥牛同燜肉嘅質感都好好，唯一嘅缺點就係滷蛋不太入味，如果鹹返少少會更好。整體嚟講呢碗米粉都幾好食。

自選米粉—麻辣湯；三餸—鹵水雞翼、麻辣豬耳、娃娃菜（$47）

另一碗米粉都係麻辣湯底，配料有鹵水雞翼、麻辣豬耳同娃娃菜。鹵水雞翼嘅肉質好鮮嫩亦夠入味，娃娃菜清爽爽口，而麻辣豬耳帶啲微辣味，依個三餸組合都唔錯。

用鍚紙盆來隔熱，第一次見的！

木瓜冰（主食加6蚊）

最後嚟到店家招牌嘅「木瓜冰」，平時如果聽到「木瓜冰」會以為係沙冰。但呢款木瓜冰其實係類似愛玉冬瓜茶，底部有黑糖的味道而上面就係晶瑩通透嘅啫喱，全杯不帶一點木瓜味（木瓜愛好者可能要失望了），但如果鍾意飲台式飲品，就一定會好鍾意呢一杯野飲了！

整體嚟講，「雲南人家」嘅味道同服務都幾好。店員好友善，而選擇都好多，價錢亦算係街坊價。如果你住喺附近，不妨嚟試下佢哋嘅自選米粉同埋木瓜冰啦！！！

以下係我的評分（滿分為５分）： 味道：4分

環境：3.5分

服務：4分

價錢：4.5分

推薦程度：4分

雲南人家風味餐廳

網址: https://s.openrice.com/QrbS0itq000~uKZISBA 

地址: 新蒲崗康強街32-34地下8號 

電話: 23293030

餐牌

主餐牌

主餐牌

主餐牌—飯類

餐牌 — 小食

環境

內在環境

內在環境