全港CP值最高的高質素食兩餸飯 — 活力素食 TT Veggie @香港科技大學

兩餸飯係香港開到成行成市，相信香港人都唔會陌生。不過，對於素食者而言，肉類佔多數的兩餸飯未必咁啱胃口。今日想介紹的，就係科大內面的一間素食兩餸飯。食過不下十次，會形容佢係全香港CP值最高的素食兩餸飯，抵食到星期六特登入科大食都值得！

活力素食主打兩餸飯，加多5蚊可以有埋第三餸，而佢抵食之處在於可以免費改選炒麵／炒飯，飯上亦加再比菜，更配有中湯，都只係33蚊，份量好足料。味道方面，老實講比出面D素食餐廳好味得多！

素食三餸飯($38) 

每日佢都會有十款左右餸比人選擇。今日我點左三餸—黑椒薯仔、椒鹽豆腐、紅燒茄子，配炒飯同中湯。三款都好好味，紅燒茄子同黑椒薯仔平時都會見得多，但椒鹽豆腐真係非常驚喜，因為好少係兩餸飯店見到依款菜式，咬落去仲要係脆同熱的，好似去酒樓食飯咁！

除左兩餸飯，佢都有其他選擇，所以影下餐牌比大家睇。因為兩餸飯太出色的關係，我就無試過其他餐了。此外，佢亦有台式飲品比大家揀，跟餐買的話會有特價的，有興趣可以一試！

總結而言，雖然地點唔係市區，但味道、價錢、份量而言都係值得特登入科大去食的一間素食餐廳！唯一要注意的是，佢星期日唔開。

以下係我的評分（滿分為５分）： 

味道：5分

環境：4.5分

服務：5分

價錢：5分

推薦程度：5分 

活力素食  (TT Veggie) 
網址: https://s.openrice.com/QrbS08VG900~uKZISBA
地址: 西貢清水灣香港科技大學學術大樓LG7樓
電話: 24261838
營業時間: https://cso.ust.hk/special-opening-hours  (睇TT Veggie)